يلي بيقدر ينهي قراءة النص بدون ضحك بكون من جيل ال 2000

بعيدا عن جو الانتخابات و جوازات السفر النادرة الوجود… 🔥😏

يلي بيقدر ينهي قراءة النص بدون ضحك بكون من جيل ال 2000
اعتقد ان الكثير من جيلنا حصلت معهم

واحد كاتب تجربتو لما تحممو امو :👇

لما كنا زغار كنا نكره الحمام ليش ؟؟؟

لانه أمهاتنا الله يطول بعمرهن ويرحم المتوفيات منهن كانوا يعذبونا تعذيب لما يحممونا ..

لما تقلي قوم عالحمام أنصرع من الخوف وما اعرف وين بدي اتخبى لاهرب من تحميمها

تبدأ رحلة العذاب من تشليح التياب ..

تشلحني الكنزة تقول عم تنتف ريش دجاج .. ودينيي كل واحده بجهة .

طول ما عم تتحمم بدك تضل قاعد قرفصة ..

طيب يا ماما عن جد اجرييّ وجعوني ..

عالسريع بتناولني كف وبتقلي سكّر تمك ..

بالنسبه للميّ يعني بتكون تحت درجة الغليان بنتفة .

يا يا ماما لحمي داب انلهط!

بيجي الكف الثاني .. سد بوزك بدي خلص بعد في خيك..

لما تفرك راسي بتقول كانها عم تفرك بمصباح علاء الدين حتى تطلّع المارد
وراسي بلولح يمين وشمال ورقبتي ارتخوا عزقاتها.

والمشكله لما ينزل صابون عوجك وبدها تشيلو بتغير ملامح وجهك .. غير حرقة العينين

والمشكله اكبر اذا كانت الصابونة “ص ع” أقسى من الحجر .. والفرك فيها متل يلي عم يدعكك بحجر ..

نجي لعند ما تمسك منخارك وتقلك ” ننننفففففف “

بتصير تنف من دينيك .. لأنه كل مجاري التنفس مسكرة

فقرة التلييف :

بتمسك الليفة وبتفركها بالصابونة وهي عم تطلع فيك.. تقول لحّام عم يسن سكاكينو للدبح

الحمد لله انو الجسم بيحمل شوي .. والا فركها للجسم بسبب شلل رباعي ..

طيب .. هدّي شويّ يا ماما أنا حاسس كأنك عم تبرشي جبنة ..

طبعا الحمام بالدور .. والكبير قبل الزغير ..

ولما أسمع خيي الكبير عم يبكي وهي عم تحممو .. أنا بالغرفة الثانية بصير أبكي من الخوف (انا الكبير بهالحالة، بفتكر خيي لي كان يخاف)

بعد الحمام بتطلّع عحالك بالمراية والبخار عم يطلع من جسمك كأنك طنجرة ضغط مفتوحة .

الاصابع بكونو مجعلكين ولون جسمك أبيض واحمر من كتر الفرك .

منجي على تلبيس الأواعي ..

راسك قد قبة البلوزة على خمس مرات وبدها تفوتلك ياه بالطول بالعرض مش مهم المهم يفوت..

بتلبس أول بلوزه وثاني بلوزة .. ويا ويلك إذا فلتت الكم لما تقلك كموش ايدك حتى تلبسك البلوزة الثانية .

منجي لتمشيط الشعر ..

وحفاظا على تنظيف الراس من القمل والشوائب .. بتغرز المشط براسك وببلش موسم الحْراثه والفلاحة ، وطبعا في احتمال إنه أسنان المشط يوصلو لمخك من الشد..
مع حمام الغالية .. لو انك اسمر بتصير أبيض..😊
وهيك كان حمام إمّي بتطلع ممعوط معط!!وانتوا؟

#الجالية_اونلاين #الوجود_اللبناني