إخواننا وإخواتنا المغتربين يللي الشيطان لعبلهم بعقولهم واقنعهم ينزلوا زيارة على لبنان😬
ما علينا… شي وصار والحمدلله على السلامة، وشوية نصائح وتدابير إحترازية كرمال تمرق هالزيارة على خير:
١-جيبوا دولارات…دولارات كتير كرمال تقدروا تعيشوا بكرامتكم هالفترة 🤑
٢-حاولوا ما تنقوا كتير قدامنا لأن يللي فينا مكفينا وانتوا جايين زيارة وراجعين… نحنا علقانين هون😕
٣-قصة :”عنا بباريس مش هيك وعنا بأمريكا مش هيك وعنا بالإمارات مش هيك ” يا ريت نتخطاها… لأن اقسم بالله في بنات بتشتغل عنا بلبنان من إثيوبيا الشقيقة وكمان خبرونا انو عندهم بأديس ابابا احسن من لبنان ومش هيك
منعرف انو وين ما كان مش هيك واحسن من هيك مش ضروري تزيدوا علينا😏
٤-يللي بياخد أدوية مزمنة او أدوية أعصاب يجيب معه حاجته لأن الأدوية المزمنة غالية ومزورة وادوية الأعصاب صارت مفقودة لأن الإقبال عليها مش طبيعي من كافة الفئات العمرية😑 كمان جيبوا معكم بانادول لانه بطلنا نضيف منه 😅
٥-حبيباتي معليش بهالملاحظة السخيفة بس انتوا نازلين لبنان بالصيف يعني برغش وشوب وكهربا مقطوعة و guess what ؟؟ كمان الاشتراك مقطوع لأن المازوت مقطوع😁،يعني بدنا نتحمل العرق والتلزيق هالفترة😅
٦-بالنسبة للهدايا، قبل كنتوا تسألوا شو منجبلك هدية، حاليا ما في داعي للسؤال لأن شو ما جبتوا هدية رح تكون هدية غالية وثمينة حرفيا… مش جبتوا لوح شوكولا تويكس؟؟ ايه هيدا حقه 40 آلف صار
شاشة حماية للتليفون يللي ما حقها شي؟؟ هيدي صارت بم٢٥٠ الف
جيبوا هدايا وما تستحوا شو ما كانت قيمتها، لك اعطونا دولارين بإيدنا وكتر الله خيركم (صرنا شحادين العادي🤗)
٧-ما تفوت بأي جدال سياسي خلال زيارتك وما تنتقد اي مسؤول وتذكر انو كل سياسي ولأي تيار بينتمي عنده فضل عليك، لأن لولاه ما كنت فكرت تهاجر وتترك هالمزرعة🤩
٨-جربوا انبسطوا مع اهاليكم وأصحابكم لأن شكلها رح تكون آخر زيارة قبل ما يبيعونا بسوق الرقيق الأبيض والبلد يستثمروه الفرنجة ويعملوه زريبة بقر 😐
٩-اذا حكيتوا لأي شخص قديش تعبانين برا وقديش العيشة صعبة والغربة تربة مش بعيد يخبطكم بأي شي قدامه… 😅
١٠- ما تستغربوا كيف نفس الناس الي بتنق مقضيتها سهرات وضهرات وبيسين ومطاعم.. وما تسألوا كيف.. لأنه بس الله بيعرف 🤷♀️
١١- شو ما بتشوفوا مشاكل، اشكالات، استفزازات، طوابير.. عملوا نفسكم مش شايفين وخدوها بالضحكة والابستامة والروقان. 🤪
١٢-اخيرا بتمنى ما كون طولت عليكم و welcome to hell او اهلا وسهلاً بكم في وطنكم الحبيب وطن النجوم… لبنان
ملاحظة هامة: كل واحد يجيب نيسكافيته معه..☕😊
نصائح للمغتربين الذاهبين لزيارة لبنان… #الوجود_اللبناني #الجالية_اونلاين
