في موضوع حابب احكي عنه متعلق ب الشب يلي بسافر برا لبنان ليشتغل وبتبلش الناس تفكره انو عم يقطف المصاري عن الشجر .
ايه كلنا لما نسافر بنحب ننزل صورنا نحنا وعم نضحك ونحنا ومبسوطين وبنحب ناخد صور بأماكن حلوة بس هيدي عبارة عن لحظات مش لازم نقارنها بباقي الوقت يلي بنكون عم نفلح فيه من الفجر للنجر .
شايفين هيدي الصورة ؟ هيدي غرفتي لما رحت ع العراق اول اسبوع هيك نمت ع الارض بلا مكيف بلا شي . انا انسان متصالح مع نفسي كثير يعني مثل اجري بنزل الصورة واخر همي . بس في شباب متغربة عم تحاول تبني نفسها ومستقبلها ما تحسدوها ع صورة حلوة نزلوها ، ايه وكمان شغلة يمكن بلبنان بتتعب ب الشغل بس اخر النهار بتضهر او بتقعد مع رفقاتك . المغترب هون بخلص شغل بروح بيقعد بين ٤ حيطان عشان تاني يوم ينزل ع الشغل وهيك بيمرق العمر وهيك مرق عمري من لما تغربت سنة ١٩٩٤ لهلق . نحنا مناح بس ما تحسدونا ع عالعيشة يلي بتشوفوها بصورنا وعقبال ما كل يلي بحب يهاجر الله يفتحها بوجه وساعتها بيعرف عن شو عم بحكي..
بقلم الصديق عباس زهري
