إخواننا وإخواتنا المغتربين يللي الشيطان لعبلهم بعقولهم واقنعهم ينزلوا زيارة على لبنان
ما علينا… شي وصار والحمدلله على السلامة، وشوية نصائح وتدابير إحترازية كرمال تمرق هالزيارة على خير:
١-جيبوا دولارات…دولارات كتير كرمال تقدروا تعيشوا بكرامتكم هالفترة
٢-حاولوا ما تنقوا كتير قدامنا لأن يللي فينا مكفينا وانتوا جايين زيارة وراجعين… ونحنا راجعين معكن…
٣-قصة :”عنا بباريس مش هيك وعنا بأمريكا مش هيك وعنا بأفريقيا مش هيك ” يا ريت نتخطاها… لأن اقسم بالله في بنات بتشتغل عنا بلبنان من إثيوبيا الشقيقة وكمان خبرونا انو عندهم بأديس ابابا احسن من لبنان ومش هيك
منعرف انو وين ما كان مش هيك واحسن من هيك مش ضروري تزيدوا علينا
٤-يللي بياخد أدوية مزمنة او أدوية أعصاب يجيب معه حاجته لأن الأدوية المزمنة غالية ومزورة وادوية الأعصاب صارت مفقودة لأن الإقبال عليها مش طبيعي من كافة الفئات العمرية
٥- معليش بهالملاحظة السخيفة بس انتوا نازلين لبنان بالصيف يعني برغش وشوب وكهربا مقطوعة وكمان الاشتراك مقطوع لأن المازوت مقطوع ،يعني بدنا نتحمل العرق والتلزيق هالفترة
٦-بالنسبة للهدايا، قبل كنتوا تسألوا شو منجبلك هدية، حاليا ما في داعي للسؤال لأن شو ما جبتوا هدية رح تكون هدية غالية وثمينة حرفيا… مش جبتوا لوح شوكولا ؟؟ ايه هيدا حقه سبع آلاف صار
شاشة حماية للتليفون يللي ما حقها شي؟؟ هيدي صارت بخمسين الف
جيبوا هدايا وما تستحوا شو ما كانت قيمتها، لك اعطونا دولارين بإيدنا وكتر الله خيركم (صرنا شحادين العادي)
٧-ما تفوت بأي جدال سياسي خلال زيارتك وما تنتقد اي مسؤول وتذكر انو كل سياسي ولأي تيار بينتمي عنده فضل عليك، لأن لولاه ما كنت فكرت تهاجر وتترك هالمزرعة
٨-جربوا انبسطوا مع اهاليكم وأصحابكم لأن شكلها رح تكون آخر زيارة لأنو رح نسكر…
٩-اذا حكيتوا لأي شخص قديش تعبانين برا وقديش العيشة صعبة والغربة تربة مش بعيد يخبطكم بأي شي قدامه…
وأخيرا إذا حابين تبقوا نحنا أصلا كنا رح نبعتلكم ترجعوا لأنه صار دورنا نطلع.
وإذا ناوين ترجعوا فنحنا راجعين معكم أو مندبر كيف نطلع ….
ورجاء أخير آخر واحد بفل ما يطفي الضوء وما يحط المفتاح تحت الدعسه جيب المفتاح معك…..
