الجالية اونلاين
باقلامكم

عم تسألونا ليش هاجرتو .. بقلم الشاعر قاسم بدران

بإسم الوطن والدين تاجرتو
وبعيونا الأحلام دمرتوا
عمرنا سرقتوا يا سياسيين
وعم تسألونا ليش هاجرتو ؟

طفلنا عم يشكي من الحرمان
باكي بيغفى عمخدتو جوعان
حتى رغيف الخبز صفي يبسان
وعم تسألونا ليش هاجرتو ؟

تخرسن لسان الحق والكلمي
وماتت فوق شفافنا البسمي
من الفقر صرنا نشحذ اللقمي
وعم تسألونا ليش هاجرتو ؟

الفجر عم يسكب علينا دموع
عم تنهشوا أنياب ليل الجوع
دابوا على أهاتنا الشموع
وعم تسألونا ليش هاجرتو ؟

ما الوطن حراسو …. حرامية
بيتحصنوا خلف الديمقراطية
تا يسرقوا الخيرات يومية
وعم تسألونا ليش هاجرتو ؟

وحش الفساد بيناتنا رابي
تعليم ما عنا ولا طبابي
بلاد الثقافة تحولت غابة
وعم تسألونا ليش هاجرتو ؟

النور انذبح بمسلخ التقنين
وللطائفية عم تفتحوا دكاكين
صرنا بنفس الحي منقسمين
وعم تسألونا ليش هاجرتو ؟

نحن ما هاجرنا ولا رحنا
بعدو القلب غافي بمطارحنا
ديماً أنين الشوق دابحنا
وعم تسألونا ليش هاجرتو ؟

لبنان إسمو للمجد غنّى
مْنبقى ولادو وين ماكنّا
وانتو حملتوا نعش موطنّا
عليه اجتمعتوا وفيه آجرتوا
وعم تسألونا ليش هاجرتوا؟؟

روحو اسألوا عن جملة الأسباب
اللي هجروا الشبّان والشياب
روحوا سألوا الوزرا سألو النواب
يمكن في عندن حس يعطو جواب
ولا تسألونا ليش هاجرتو …….

اقرأ ايضا

لا تهينوا اسودكم حتى لا تاكلكم كلاب اعدائكم

Firas Suleiman

رسالة شكر و تقدير من السيدة ناهدة العبني الاحمدية لموقع الجالية اونلاين

Firas Suleiman

نعم لاعادة قانون تنفيذ حكم الاعدام في لبنان …

Firas Suleiman

اترك تعليق

إحدى عشر − 1 =