“شو فارقة معك انت مغترب”
يا بشر خفوها شوي علينا
المغترب ( غريب – بعيد – وحيد ) …
ذاق المر واللوعه الف مره قبل م يذوق الحلوه و كل يوم بيمرق يمكن يكون عميدفع حقه دم ، و من سنين لورا ، قلال جدا الي كانوا يقبلوا يتغربوا بل كان يتمسخروا علينا و يعتبروا اننا متغربين كرمال القليل من الفتات
مين هو المغترب :
هو يلي بعت 200 دولار ل إمو يلي اشترت فيهم من الدكنجي ومن الخضرجي ودفعت فاتورة الكهربا والمي وتصليحات المي
المغترب هو الي لما عرف حدا محتاج كان له السند ، و لما التقى باخ له من لبنان مقطوع بالغربه وقف جنبه و ساعده
المغترب هو يلي بعت حق سيارة لأخوه كرمال يشتغل عليها و يطعمي أولاده و هي السيارة بيصلحها كهربجي و ميكانيكي و بيقبض كرمال اولادوا
المغترب هو هذا الشخص الي لما ينزل علبنان بينزل حامل محمل و جيبه مليان بيصرف بلبنان لانه محروم من كل شي بغربته و بيدفع مصاري بيدعم اقتصاد البلد و لما يرجع يمكن يتدين كرمال يعطي الشفير او الي رح يحمله الشنط
سألتو ا نفسكم كيف عايش ببلاد برا المغترب؟ ؟ وكيف مقضي أيامه ؟ بعيد عن اهله وبلده و أحبابه …
كم عيد كان بحياتو مع اهله وعائلته ،
كيف بينام وشو بياكل وكيف بيمرض وبيكون وحيد بغربته
…. بيفقد احباب وهوي بعيد . بينزل بيلاقي رفيقه صار غريب عنه وبيلاقي فلان كبر وفلان تزوج وفلان وفلان ….
وكثير اشياء وقد ما حكي الواحد ما بيعرف قيمة الغربة غير المغترب ….
هذا المغترب بيقضي سنين من عمره عم يدفع لتستمرو ا بالحياة بكرامة… قدر المستطاع
واخر العمر … راقبو الباب الخلفي لأي طيارة راح تلاقو نفس المغترب محمل بصندوق خشب ليندفن بلبنان وطبعا لا تنسوا هو دفع حق القبر مسبقاً….
ارحموه بعباراتكم القاسيه و انتبهوا إنه له الحق في لبنان وله
حق يعطي رأي بكل شي لانه المتضرر رقم واحد من الازمة……
انتو بلبنان كل واحد بشوف مشكلته لوحده
بينما المغترب بشوف مشكلتك ومشكلة أخوه واخته وكل اخواته وقرايبه ….. نظرته للامور اوسع بكتير من نظرتك حتى لو انت عايش بقلب المشكلة لكن هو شايف افضل منك … لان من وجعك ما قادر انت تشوف حواليك وهيدا حقك .. وهو حقه يشوف لبنان بكرا بلكي بيلحق يعيش فيه كم يوم قبل ما يموت…
🇱🇧❤
بقلم الزميل علي سرور #الجاليةاونلاين #الوجوداللبناني
