تشهد الدول الافريقية عودة كثيفة لحملة الجنسيات الافريقية من اللبنانيين..
ابن خمسين و ستين سنه رجع ع دولة تركها من سنين لينزل يستقر بجنب عيلته، بعد سنين مضت من التعب و البعد، قدر بوقتها يجمع قرشين ليعيش فيهن ع كبر..
لكن للاسف طار حلمه و طاروا مصرياته و طار البلد و طار هو ع بلد لي قال ما عاد يرجعلوا، ليرجع يبحث عن قوت يومه و رزقه من جديد…
- اديش صعبه ابن خمسين و ستين سنه يوقف ع باب شركة ليسال عن شغل؟
- اديش صعبة ابن خمسين و ستين سنه ينتظر بصالون (مترين بمترين) بانتطار اذن من شاب من عمر ولاده.. ليدخل يقابله..
- اديش صعبة ابن خمسين ستين سنه يكون ببلد ما قادر ياكول ٣ وقعات باليوم لان مصرياته لي جايبهن معه و متدينهن دين بلبنان يمكن ما يكفو لاخر الشهر..
و كمان في حق من جهة تانيه ع الشباب 😒
عشرات الشباب لي عم توصل ع البلد بفيزا سياحة، و بالاخر بتتصل لتقول دبرونا (نحنا بلا اكل بلا شرب بلا شغل)
الاكل و الشرب بيتامنوا و الشغل عم نعمل كل جهدنا لتامينه، بس السؤال؟
- قبل ما تطلعوا من #لبنان ليش ما دبرتوا شغل وطلعتوا بطريقة متامنلكن كل شي ؟؟
- قبل ما تطلعوا من لبنان مين خبركن انو الفيزا السياحية ممكن تاخد عليها اقامه و كيف؟؟
- قبل ما تطلعوا من لبنان شو كان هدفكن غير انو تركبوا طيارة و تجو ع شوارع دول افريقية و هل فعلا الهدف الضغط ع ابناء الوجود اللبناني فيها؟؟؟ اليكم #الجواب لي سمعناه من اغلب لي حكيناهن.
قالولنا انو الجالية الفلانية ما بتقبل تخليكن تنامو بالطريق
صحيح، ما حدا ب اي دولة بيقبل يخليك تنام بالطريق بس انت كيف بتقبل ع نفسك تكون شخص معتمد على حياء الاخرين و تكون ورقة ضعط عليهن.. فقط لاجل مصلحتك؟؟
و بدك تفهم الناس ممكن تحملك يوم / تنين/ تلاته / شهر /بس بالنهاية يمكن تضطر تنزل ع لبنان و انت خسران حتى ثمن الفيزا و التكت، لهيك حاولوا بس بدكن تطلعوا ع اي بلد امنوا شغل فيها افضل..
و بالختام ، يحزننا انو بلدنا محكوم من قرطة زعران سرقونا و سرقوا بلدنا و هجروا كبارنا قبل صغارنا.
